ياناس يافل 000 القراية للكل

والله مشروع عظيم بتاع القراءة للجميع وابصم بالعشرة ان السيدة سوزان مبارك قدمت خدمة لاتقدر بثمن لكل جمهور القراء لاننى واحد من الناس الذين عانوا من اجل توفير ثمن كتاب وكانت الثقافة كانها ترف لايقدر عليه الا المقتدرون
اما بالنسبة لحضراتكم ياحلوين ياطعمين انا مش عارف اقول ايه ؟؟
عاوزين ثقافة وعاوزين كتب وعاوزين وعاوزين
لكن محدش بيسعى يجيب كتاب ويشارك الاخرين فيه لان نص حلاوة القراءة فى المناقشة حول الكتاب
وبعدين كان فى زمان حاجة اسمها نادى الكتاب حد فيكو سمع عنها ؟؟
كانت تقام ندوات لمناقشة الكتب وساعات الواحد ماكانش يفهم من الكتاب كان بيفهم من المناقشة وياريت نعرف نعيد هذا التقليد لان فعلا المناقشة حول كتاب شىء جميل 000 على الاقل احسن من المناقشة حول فيديو كليب من بتوع الايام دى !!
انا البوست ده كاتبه لانى لاحظت نمو فى موضوع المدونات وبصراحة انا عاوز اقول ان احنا فى عصر المدونات كنوع جديد من الادب
وهذا النوع يتميز بالتلقائية والحرية المفتوحة غير المحدودة بس بيحط على الكاتب عبء انه يكون ملتزم من نفسه بدل مايكون حد مراقب عليه
وبصراحة انا شفت شوية مدونات تجنن وسعدت جدا بهذا الجيل من المدونين
بس لى ملحوظة واحدة
ليه كل الناس نازلة شتيمه فى البلد واللى بيحصل واللى حصل واخر ثورة طيب ياجماعة ماتيجوا نبتدى ونعلم الناس ازاى يتعاملون بالكلمة الحلوة بدل التكشيرة وبالتسهيل بدل التعطيل 000 والله سهل قوى
كل واحد بدل مايفقع له مدونة ويصرخ ويعمل فيها عنتر يحاول يحل مشكلة شخص واحد على الاقل بكده ح نكسب حاجتين :
اولا : ح نحل مشكلة شخص يعانى وهذا شىء جميل
ثانيا وهو الاهم : ان هذا الشخص ربما يؤثر فيه ماحدث فيقوم بالتعامل بالطريقة الجديده مع غيرة

وبكده ممكن نكسب اسلوب جديد فى التعامل وتبقى الدنيا ربيع والجو بديع
لان الناس لو اتعلمت تصبر على المصيبة لحد مايطلع لها حل ح نكون كويسين
معلش كلام تقليدى من راجل عجوز
لكن مش ح تلاقوا احسن منه تعملوا ايه بقى ؟؟

اسعدونى بمشاركاتكم

محمد جلال

ملحوظة : ممكن تكتب اسمك داخل المشاركة فى حالة دخولك مجهول وبكده اقدر اعرف مين اتكرم على بالتعليق واقدر اشكره بالاسم
ياميكو ويامرمر وياهانى تعالوا شاركونى واكتبوا حاجة وللا انتم بنيتم لى بيت وسيبتونى افرشه لوحدى ؟؟

من فضلكم 00

مرحب بكم جميعا فى بيت الكتب 00

تكرمت اختنا مرمر بعمل هذا البلوج لنضع فيه الكتب النادرة والتى تستحق القراءة

طبعا من عندى ح انزل كتب كتيره انشاء الله

لكن احب برضه المشاركة

وكل اللى يحب يحط كتاب اهلا بيه ومعنديش مانع

بس ياريت تتصل اولا على الايميل بتاعى للتواصل

galalgalal@yahoo.com

وشكرا مقدما لكم احبائى جميعا ومرحبا الى بيت الكتب بيتكم جميعا

محمد جلال

كان ياما كان ياساده يا كرام و مايحلي الكلام ألا بذكر النبي عليه الصلاه و السلام واحد اسمه جلال كل همه يشوف الناس سعيدة و راضيه و كل سعادته في الدنيا يشاركهم بكتبه كتبه اللي من الزمن الجميل العتيق الكتب اللي تشبع النفوس و تملي العنين عارفنها اللي مش تيك أواي أي و الله مش علي الماشي علشان كده قلنا نعمل الحاجه البسيطه دي هديه عرفان بالجميل و نقوله ربنا مايحرمنا من ابوتك و حنانك و اهتمامك و كتبك
شكرا بابا جلال